Ветковский музей, ночь музеев 2022

Запрашаем на Этна-ЭкаМАРАФОН “Жывая вада” у НОЧ МУЗЕЯЎ.

Адну з самых доўгачаканых “начэй” філіял Веткаўскага музея ў Гомелі сустрэне гэтым годам 21 мая.

💦 “Жывая вада” – так гучыць тэма асноўных дзействаў, што разгорнуцца гэтай ноччу на інтэрактыўных пляцоўках музея. Тут будзе месца і выставачным праектам, і традыцыйным спевам, і майстар-класам, і пытанням сучаснай экалогіі.

З 18:00 да глыбокай ночы наведвальнікі музея наведаюць чатыры выставы з суправаджэннем куратараў і лектараў:

  • “Разьбяр. Ад ідэі да ўвасаблення”;
  • “Жывая вада. Культ крыніц у традыцыйнай культуры”;
  • “Беспапоўцы. Этна-, ІканаГРАФІЯ”;
  • “Лёс бабіцкага лесу”.

Для прыхільнікаў традыцыйнага ткацтва будзе дзейнічаць зала “Жывое рамяство” з майстар-класамі па ткацтву і магчымасцю далучыцца да таямнічай ткацкай справы.

Канцэртная пляцоўка пазнаёміць наведвальнікаў з традыцыйным абрадавым спевам Гомельскай зямлі: фальклорныя калектывы Ельскага, Кармянскага, Чачэрскага, Гомельскага і Веткаўскага раёнаў падзеляцца сваімі велічнымі спевамі. А моладзевы калектыў Гомельскага каледжа мастацтваў імя Н. Сакалоўскага падтрымае архаічную традыцыю і загучыць па новаму, а таксама паспрабуе навучыць майстэрству валодання традыцыйным голасам усіх жадаючых.

Дзіцячая пляцоўка будзе балаваць нашых самых маленькіх наведвальнікаў казкамі, байкамі, майстар-класамі і светам райскіх колераў традыцыйнай вышыўкі, выцінанкі і маляванкі.

Сакрэтамі свайго майстэрства падчас майстар-класаў падзеляцца разьбяры, ганчары, вышывальніцы, вязальніцы і іншыя «ўмелыя ручкі».

Разабрацца ў перыпетыях сучаснай экалогіі воднай прасторы дапаможа арганізацыя АСДЭМА.

🎵 Мастком паміж архаічнай традыцыяй і сучаснай моладдзю стануць выступ гомельскага гурта «БіФолк» і вясёлыя рытмы этна-дыскатэкі “Водна дбайна”.

Далучайцеся да нашага рэчышча і спазнавайце традыцыйную культуру самі і разам з намі!


Час правядзення: 21 мая, з 18:00 да 23:00.

Кошт: уваход бясплатны (вітаецца free donation).

Месца правядзення: філіял Веткаўскага музея ў Гомелі. г. Гомель, пл. Леніна, 4а. (тэрыторыя гомельскага палацава-паркавага ансамбля).